ZIARA YA WAZIRI MKUU MKOA WA SHINYANGA

Posted on: August 9th, 2019

Waziri Mkuu wa Tanzania Mheshimiwa Kassim Majaliwa amefanya ziara katika Mkoa wa Shinyanga kwa kutembelea miradi mbalimbali ya maendeleo,zikiwemo nyumba 10 za makazi ya askari Polisi zilizopo Manispaa ya Shinyanga Pamoja na kutembelea kiwanda cha FRESHO kilichopo Manispaa ya Shinyanga ambacho kinajishughulisha na ukusanyaji na uchambuaji wa Pamba.

Mhe. Majaliwa amekabidhi funguo kwa askari 10 watakaoanza kuishi kwenye nyumba hizo zilizogharimu jumla sh.225 milioni na kufunguliwa na IGP Said Sirro hivi karibuni.

Pia amepongeza uongozi mzima wa mkoa kwa kufanya kazi nzuri katika ujenzi wa nyumba hizo.Aidha Waziri Mkuu amesisitiza kutunzwa vema kwa nyumba hizo huku akiwataka wahusika kutoharibu miundombinu ya nyumba hizo kwa makusudi hasa ikizingatiwa kuwa hizo nyumba ni mali ya umma,na askari yoyote anaweza kuishi hapo endapo kutatokea uhamisho au kuachishwa kazi kwa wanaoishi katika nyumba hizo kwa sasa.

Akiwa katika kiwanda cha FRESHO Waziri Mkuu amekutana na wauzaji wa Pamba ambao walimwelezea kero zao mbalimbali hasa mazingira magumu ya uuzaji wa Pamba hizo.

Akihutubia Wananchi wa Shinyanga katika kiwanda cha FRESHO Waziri Mkuu alitoa ahadi kwa Wakulima wa Pamba Kwa kuwahakikishia kuwa serikali haijawaacha nyuma wakulima na itahakikisha Pamba yote inanunuliwa kwa wakati.

“Nataka niwahakikishie kuwa Serikali imejikita kuhakikisha ubora kuanzia kwenye maandalizi, kilimo chake, pembejeo na kuhakikisha masoko yanapatikana”

Amesema kutokana na zao la Pamba kuuzwa Kimataifa, hivyo hali ya soko la nje kuwa bei ndogo na soko la ndani limeyumba pia, kwa hali hiyo Serikali pamoja na wanunuzi wamekaa na kutafakari namna gani ya kuiondoa pamba kwa wakulima.

Aidha, Mhe. Majaliwa ametoa rai kwa wanunuzi wenye viwanda vya kuchambua pamba kujitanua zaidi kufikia viwanda vya kutengeneza nguo na kuwa, Serikali itawaunga mkono kwa kila hatua.

Pia aliwaomba Watumishi katika Halmashauri Kuishi kwa Upendo na Kuchapa kazi bila Majungu yoyote ili kuleta ufanisi kazini.